Die volgende pelsveiling is geskeduleer vir 13 April 2010. Net minder as 80 000 pelse is ontvang en met die grys en uitskot pelse wat agterbly gaan daar ongeveer 75 000 pelse aangebied word. Van hierdie getal is ongeveer 5 500 wit pelse en `n paar honderd bruin en die res swart pelse.
Die sortiment se haarlengte blyk korter te wees as in September as gevolg van die droër voorsomer maar daarmee saam is die kwaliteit nie so goed soos wat ons in September 2009 aangebied het nie.

Die mark vir pelse in die algemeen is baie positief. ‘n Nertsveiling gehou in Desember 2009 het `n gemiddelde styging van 36% teenoor die September 2009 veiling getoon en die Februarie 2010 veiling het ongeveer 15% gestyg teenoor die veiling van Desember 2009. Op albei die veilings is alle pelse wat aangebied is (1.3 miljoen in Desember en 4 miljoen in Februarie), verkoop.
“Blue fox” wat oor die laaste paar gesukkel het om te verkoop a.g.v. ‘n ooraanbod het nou weer begin verkoop met `n 30% styging op die Februarie 2010 veiling teenoor Desember 2009. Dit is ook `n teken dat die vraag na pels in die algemeen baie positief is.
Die Chinese bly die grootste kopers van pelse en rekordgetalle kopers is geregistreer by die veilings. Nie- amptelike berigte van ons vriende in die pelswêreld beweer dat die Chinese begin navraag doen het oor swakara maar lae pelsgetalle bly die grootste struikelblok.